ກໍ່ສາ

ລະຫັດ: LT0689
ຊື່ລາວ: ກໍ່ສາ
ຊື່ວິທະຍາສາດ: Quercus griffithii f. & Thomson ex Miq.
ຕະກຸນ: FAGACEAE
ຊື່ການຄ້າ (Trade names) : KOR SA (LA)
Common names: Ring Cupped Oak
ພັນລະນາລັກສະນະພືດສາດ (botanical description: morphology ແລະ anatomy)

ລັກສະນະໂຄງສ້າງພາຍນອກ

ເປັນໄມ້ຢືນຕົ້ນຜັດປ່ຽນໃບຂະໜາດກາງສູງ 20 ມ, ເຮືອນຍອດເປັນຮູບຂອບຂະໜານ. ເປືອກສີເທົາ ຫຼື ສີນໍ້າຕານປົນສີອອກແດງ, ມີຮອຍແຕກຕາມລວງຍາວ. ໃບ: ໃບດ່ຽວ, ປົ່ງແບບວຽນສະລັບຈັດເປັນວົງ, ໃບຮູບໄຂ່ປີ້ນຫາຮູບຮີ, ໃບອ່ອນສີແດງ, ໃບແກ່ດ້ານເທິງເຫຼື້ອມເປັນສີຂຽວເຂັ້ມ, ແຄມໃບເປັນແຊັກແຫຼມ, ປາຍໃບສ້ວຍແຫຼມ ກ້ານໃບຍາວ. ດອກ: ດ່ຽວ ຫຼື ເປັນຈຸ້ມເປັນສອງຫາສາມ, ຮູບຊົງເປັນຈອກ, ເກັດເປັນຮູບໄຂ່ຫາສາມຫຼ່ຽມ. ອອກດອກໃນເດືອນກຸມພາ-ມີນາ. ໝາກ: ເປັນຮູບສ້ວຍຫາຮູບໄຂ່, ມີໜຶ່ງສວນສາມ ເຖິງ ເຄິ່ງໜຶ່ງ ຄວາມຍາວຂອງໝາກຖືກຫຸ້ມຢູ່ໃນຈອກຫຸ້ມສີນໍ້າຕານເຂັ້ມ, ການອອກໝາກ: ເດືືອນຕຸລາ-ເດືອນພະຈິກ.

ລັກສະນະໂຄງສ້າງພາຍໃນເນື້ອໄມ້

ເນື້ອໄມ້ກໍ່ສາມີສີເທົາ ສ້ຽນຊື່. ລັກສະນະທາງກາຍວິພາກທີ່ເຫັນໄດ້ດ້ວຍແວ່ນຂະຫຍາຍ (Handlens) ຂະໜາດ 10-15 ເທົ່າ ພໍຣ໌ (Pore) ເປັນແບບ ພໍຣ໌ດ່ຽວ (Solitary pore) ເປັນແຖວໃນເຂດຕົ້ນລະດູມີຂະໜາດໃຫຍ່ເປັນແຖວຕາມລວສຳຜັດພຽງໜຶ່ງແຖວ ແລະ ມີຂະໜາດນ້ອຍໆແຕກໂຕນໃນເຂດທ້າຍລະດູ, ແບບຂອງການຮຽງຕົວແບບລູກໂສ້ທີ່ມີລັກສະນະຂ້ອນຂ້າງສະຫຼຽງ (Oblique), ການກະຈາຍເປັນແບບເຫັນວົງປີຊັດ (Ring porous), ເສັ້ນ (Ray) ເຫັນຊັດເຈນເປັນເສັ້ນແລບໆ ສະຫຼັບເສັ້ນແຖບກ້ວາງສາມາດເຫັນດ້ວຍຕາເປົ່າ ມີສານ Deposit ແຊກຢູ່ໃນເຣ ເປັນສີຂາວ, ພາເຣງຄິມາ (Parenchyma) ແບບ Reticulate parenchyma ທີ່ມີຂະໜາດຄວາມກວ້າງຂອງແຖບເທົ່າກັບຂະໜາດຄວາມກວ້າງຂອງ ray ແລະ ໄລຍະຫ່າງລະຫວ່າງແຖບ parenchyma ເທົ່າກັບໄລຍະຫວ່າງເຣ ເຮັດໃຫ້ຕິດກັນເປັນຮູບຕາໜ່າງແຫ.

ການນໍາໃຊ້: ເປັນໄມ້ເນື້ື້ອແຂງ, ເພິ່ນນໍາໃຊ້ສໍາລັບເສົາຮົ້ວ, ໄຖ, ໃຊ້ເປັນພື້ນທີ່ສໍາລັບປູກເຫັດ. ລັກສະນະພິເສດຂອງໄມ້ກໍສາແມ່ນມີລະບົບຮາກທີ່ຢັ່ງເລິກລົງໃນດິນ ແລະ ສາມາດປ້ອງກັນຈາກການເຊາະເຈື່ອນຂອງດິນໄດ້.
ແຫຼ່ງທີ່ຢູ່ອາໃສ: ເພິ່ນມັກພົບເຫັນໃນປ່າປະສົມ ແລະ ປ່າດົງດິບແຫ້ງແລ້ງ ສາມາດເກີດ ຮ່ວມກັນກັບກໍແຄະ ໄມ້ແປກສາມໃບ ແລະ ໄມ້ຮີ້ງ.
ການກະຈາຍພັນ: ແມ່ນຊະນິດທີ່ພົບເຫັນຢູ່ ປະເທດມຽນມາ, ໄທ, ຫວຽດນາມ, ພາກກາງ ແລະ ພາກໃຕ້ຂອງ ສປ ຈີນ ແລະ ພາກເໜືອຂອງ ອິນເດຍ. ສໍາລັບ ສປປ ລາວ ພົບເຫັນຢູ່: ແຂວງ ຊຽງຂວາງ.
ສະພາບການອະນຸລັກ: ເປັນໄມ້ປະເພດບໍໄດ້ຢູ່ໃນບັນຊີ 0448 ຂອງກະຊວງກະສິກຳ ແລະ ປ່າໄມ້.
ໝາຍເຫດ: ຈະສັງເກດໃບປົ່ງດ່ຽວວຽນສະລັບ, ແຄມໃບເປັນແຊັກແຫຼມ, ກ່າງຂັ້ນສອງ 12–18 ເສັ້ນຢູ່ແຕ່ລະດ້ານຂອງກ່າງກາງ.
ເອກະສານອ້າງອີງ