ໝີ່ຫອມ

ລະຫັດ: LT0548
ຊື່ລາວ: ໝີ່ຫອມ, ບົງຂາວ
ຊື່ວິທະຍາສາດ: Litsea monopetala (Roxb.) Pers.
ຕະກຸນ: LAURACEAE
ຊື່ການຄ້າ: MI HOM (LA), BELEUY SLEUK THOM (KH), MEDANG (MY), ONDON-LAUKYA (MM), BOI LOI GIAY (VN),
ພັນລະນາລັກສະນະພືດສາດ (botanical description: morphology ແລະ anatomy)

ລັກສະນະໂຄງສ້າງພາຍນອກ

ເປັນໄມ້ຢືນຕົ້ນ, ສູງ 10–15 ແມັດ. ລຳຕົ້ນກົມ, ເປືອກສີເທົາ, ມີຢາງໄສ ແລະ ໜຽວ, ມີກິ່ນຫອມ, ກິ່ງງ່າອ່ອນມີຂົນ ໜາແໜ້ນ. ໃບດ່ຽວ, ຈັບແບບສະຫຼັບ, ຮູບໄຂ່ປິ້ນ, ໂຄນໃບມົນ, ຂອບໃບລຽບ, ປາຍໃບມົນ, ແຜ່ນໃບໜາຄ້າຍຄືໜັງ, ຜິວໃບດ້ານເທິງສີຂຽວເຂັ້ມ, ຜິວໃບດ້ານລຸ່ມສີຂຽວ. ຊໍ່ດອກແບບດິ້ວຄັນຮົ່ມ, ອອກຕາມກິ່ງງ່າ ແລະ ງາມໃບ, ມີ 4–6 ດອກ ຫຼື ຫຼາຍກວ່ານັ້ນ. ວົງກີບດອກມີ 5 ຫຼື 6 ກີບ, ສີເຫຼືອງປົນສີຂາວ. ເກສອນຜູ້ມີ 9 ອັນ, ຮຽງກັນເປັນ 3 ວົງ. ໝາກຄ້າຍຄືຮູບໄຂ່ຍາວ.

ລັກສະນະໂຄງສ້າງພາຍໃນເນື້ອໄມ້

ມອກໄມ້ມີສີນ້ຳຕານປົນສີເທົາ, ແກນໄມ້ເປັນສີແດງປົນສີດຳ ຫຼື ອອກສີນໍ້າຕານແດງປົນສີດຳ, ຄວາມເຂັ້ມຂອງສີຈະເພີ່ມຂຶ້ນຕາມອາຍຸຂອງຕົ້ນໄມ້ ເມື່ອປະໄວ້ດົນເນື້ອໄມ້ຈະມີສີເຂັ້ມຂຶ້ນເລື້ອຍໆ, ສ້ຽນຊື່ ຫາສ້ຽນສົນເລັກນ້ອຍ ເນື້ອໄມ້ຂ້ອນຂ້າງບໍ່ລະອຽດ. ລັກສະນະໂຄງສ້າງພາຍໃນເນື້ອໄມ້: ຈຸລັງ Vessels ມີຂະໜາດໃຫຍ່ ເຫັນດ້ວຍຕາເປົ່າ ແລະ ມີຈຳນວນຫຼາຍ ກະຈາຍແບບ Diffuse porous, ຮຽງຕົວແບບ radial rows of 2-4 or more (few) ພາຍໃນມີສານສະກັດ ແບບ Deposit ຢູ່ໃນ Vessel. ຈຸລັງ Parenchyma ຮຽງຕົວແບບ diffuse-in-aggregates, Aliform ແລະ confluent ຍາວຕໍ່ເນື່ອງກັນ. ຈຸລັງ Rays ມີລັກສະນະ Rays narrow. Large rays commonly less than 1 mm high..

ການນໍາໃຊ້: ເປືອກບົງຂາວນຳໃຊ້ເຮັດທູບບູຊາ, ເຮັດທູບກັນຍຸງ. ໃຊ້ຕາບ ຫຼື ຈອດຮອຍຮົ່ວ, ໃຊ້ທາໄມ້ເພື່ອປ້ອງກັນປວກ ແລະ ມອດ. ໃນສະໄໝກ່ອນ ຄົນບູຮານໄດ້ນຳໃຊ້ເປືອກບົງຂາວປະສົມກັບດິນແລ້ວປັ້ນເປັນຮູບປັ້ນ, ຮູບຫລໍ່ ໃນການສ້າງວັດວາອາຮາມ ຫຼື ເຮັດເຄື່ອງໃຊ້ສວຍເຊັ່ນ: ປັ້ນໝໍ້, ຫລໍ່ໄຫ ແລະ ອື່ນໆ.
ແຫຼ່ງທີ່ຢູ່ອາໃສ: ພົບເຫັນຕາມແຄມທາງປ່າດົງດິບ, ປ່າປະສົມ, ທີ່ມີຄວາມສູງຈາກລະດັບໜ້ານໍ້າທະເລເຖິງ 1500 ມ.
ການກະຈາຍພັນ: ພົບໃນເຂດປະເທດບູຖານ, ອິນເດຍ, ບູຖານ, ປາກິດສະຖານ, ມ່ຽນມ້າ, ໄທ, ຫວຽດນາມ, ເນປານ. ສໍາລັບ ສປປ ລາວ ພົບເຫັນຢູ່ ແຂວງຫຼວງພະບາງ, ວຽງຈັນ, ຈຳປາສັກ.
ສະພາບການອະນຸລັກ: ເປັນໄມ້ປະເພດ LC ຂອງ Red list of IUCN. ເປັນໄມ້ທີ່ພົບເຫັນຕາເຂດປ່າດົງດິບ, ປ່າປະສົມ, ແຕ່ໃນປັດຈຸບັນ ຖືກຕັດເພື່ອ ເປັນສິນຄ້າຕ່າງໆ.
ໝາຍເຫດ: ໄມ້ໝີ່ຫອມຈໍາແນກໄດ້ງ່າຍ ໂດຍສັງເກດເບິ່ງເປືອກມີຢາງໄສ ແລະ ໜຽວ, ມີກິ່ນຫອມ, ກິ່ງງ່າອ່ອນມີຂົນໜາແໜ້ນ. ຊໍ່ດອກແບບດິ້ວຄັນຮົ່ມ, ມີ 4–6 ດອກ ຫຼື ຫຼາຍກວ່ານັ້ນ. ວົງກີບດອກມີ 5 ຫຼື 6 ກີບ. ເກສອນຜູ້ມີ 9 ອັນ, ຮຽງກັນເປັນ 3 ວົງ.
ເອກະສານອ້າງອີງ