ແຕ້ລາວ

1. ລະຫັດ: LT0744
2. ຊື່ລາວ: ແຕ້ລາວ, ແຕ້ຮໍຂາວ, ແຕ່ຮໍຟ້າຍ
3. ຊື່ວິທະຍາສາດ: Sindora laotica
4. ຕະກຸນ: FABACEAE
5. ຊື່ການຄ້າ: TAE LAO
6. ພັນລະນາລັກສະນະພືດສາດ (botanical description: morphology ແລະ anatomy)

• ລັກສະນະໂຄງສ້າງພາຍນອກ

ໄມ້ຢືນຕົ້ນ, ສູງເຖິງ 30 ມ. ລຳຕົ້ນກົມ, ເປືອກສີນ້ຳຕານ, ມີຕຸ່ມຮອຍແຕກ. ໃບປະສົມແບບຂົນນົກປາຍຄູ່, ໃບຍ່ອຍມີ 4–6 ໃບ, ໃບຍ່ອຍຈັບແບບ​ສະຫຼັບ, ຮູບໄຂ່, ບ້ຽວ, ໂຄນໃບມົນ ຫຼື ຮູບຫຼິ່ມ, ຂອບໃບລຽບ, ປາຍໃບຮຽວແຫຼມ ຫຼື ຕິ່ງແຫຼມ, ໃບກ້ຽງທັງສອງດ້ານ. ຊໍ່ດອກແບບແຕກແໜງ, ອອກຕາມງ່າມໃບ ຫຼື ປາຍຍອດ. ໝາກເປັນຝັກ, ຮູບຂອບຂະໜານ ຫຼື ຮູບຮີ, ມີໜາມແຂງ, ກະຈາຍແບບຫ່າງໆ, ຢູ່ປາຍໜາມມີນ້ຳຢາງສີຂາວ.

• ລັກສະນະໂຄງສ້າງພາຍໃນເນື້ອໄມ້

ເນື້ອໄມ້ແຕ້ຮໍ ສ່ວນມອກມີສີຂີ້ເທົ່າ, ສ່ວນແກ່ນມີນໍ້າຕານແກ່, ມີລາຍເປັນສີແກ່ກວ່າສີພື້ນ, ສ້ຽນສົນເລັກໜ້ອຍ,ເນື້ອຂ້ອນຂ້າງຫຍາບ ແຕ່ສະໝໍ່າສະເໝີ ແລະ ແຂງ. ລັກສະນະທາງກາຍວິພາກທີ່ເຫັນໄດ້ດ້ວຍແວ່ນຂະຫຍາຍ (Handlens) ຂະໜາດ 10-15 ເທົ່າ ພໍຣ໌ (Pore) ເປັນແບບ ພໍຣ໌ດ່ຽວ (Solitary pore) ເປັນສ່ວນໃຫຍ່ ແລະ ຄູ່ 2-3 ຈຸລັງ(Multiple pore)ມີ ຈຳນວນເລັກນ້ອຍ,  ການກະຈາຍເປັນແບບກະຈັດກະຈາຍ (Diffuse porous), ພໍຣ໌ມີຂະໜາດປານການຫາໃຫຍ່ສາມາດເຫັນດ້ວຍຕາເປົ່າ ມີສານສະກັດ ແບບ tylose ແລະ Deposit ເປັນບາງພໍຣ໌, ເສັ້ນ (Ray) ເຫັນຊັດເຈນ ມີສານສະກັດຕົກຄ້າງແບບ Deposit ເປັນສີຂາວແຊກຢູ່ໃນເສັ້ນເຣ, ພາເຣງຄິມາ (Parenchyma) ແບບ vasicentric, Aliform ແລະ ແບບ​ເກີດຕາມຂອບວົງປີເຂດເນື້ອໄມ້ທ້າຍລະດູ (Terminal Boundary) ເປັນໄລຍະ.

7. ການນໍາໃຊ້: ນໍາໃຊ້ເຂົ້າໃນການກໍ່ສ້າງເຮືອນຊານ, ເຮັດເຄື່ອງເຟີນີເຈີຕ່າງໆ ຫຼື ແກະສະຫຼັກຕ່າງໆ.
8. ແຫຼ່ງທີ່ຢູ່ອາໃສ: ພົບເຫັນໃນປ່າດົງດິບ, ປ່າປະສົມ, ທີ່ມີຄວາມສູງຈາກລະດັບໜ້ານໍ້າທະເລ 300–1000 ມ.
9. ການກະຈາຍພັນ: ພົບເຫັນໃນເຂດປະເທດຫວຽດນາມ. ສໍາລັບ ສປປ ລາວ ພົບຢູ່ແຂວງວຽງຈັນ, ບໍລິຄໍາໄຊ, ຄໍາມ່ວນ.
10. ສະພາບການອະນຸລັກ: ຍັງບໍ່ທັນຈັດເຂົ້າໃນບັນຊີ ຄຸ້ມຄອງ ພົບເຫັນຕາມເຂດປ່າດົງດິບ, ປ່າປະສົມ, ແຕ່ປະຈຸບັນໄດ້ນໍາໄປໃຊ້ເຮັດເຮືອນ ຫຼື ເຄື່ອງເຟີນີເຈີຕ່າງໆ ຕາມການນິຍົມຂອງສັງຄົມ.
11. ໝາຍເຫດ: ໄມ້ແຕ້ລາວ ສັງເກດເບິ່ງໄດ້ງ່າຍ ໃບກ້ຽງ, ໝາກມີໜາມແຂງ ກະຈາຍແບບຫ່າງໆ, ປາຍໜາມມີຢາງສີຂາວ.
12. ເອກະສານອ້າງອີງ

Chika Kameda, Viengsamone Thammavong, Souphachay Phouphasouk, (2019). A Field Guide To Forest Trees and Plants For Forestry of Central Laos. Faculty of Forest Science, National Univeristy of Laos.

Forest Research Institute Malasia, (2019). Equivalent Timber Name in Asian.

Hoang Van Sam, Khamseng Nanthavong, Keßler, P.J.A., (2004). Trees of Laos and Vietnam. BLUMEA 49: 201–349.

1980. Larsen, S.S. Larsen & J.E. Vidal. 1980. Leguminosae- Caesalpiniaceae. Flore du Cambodge, Laos et Vietnam, No 18. Museum National d’Histoire Naturelle.

https://padme.rbge.org.uk/laos/list/Leguminosae/Sindora

http://biotik.org/laos/species/s/sinla/sinla_lo.html

http://biotik.org/laos/species/s/sinla/sinla_en.html