ເປືອຍແດງນ້ອຍ

1. ລະຫັດ: LT0490
2. ຊື່ລາວ: ເປືອຍແດງນ້ອຍ, ເປືອຍອອນ
3. ຊື່ວິທະຍາສາດ: Lagerstroemia floribunda Jack
4. ຕະກຸນ: LYTHRACEAE
5. ຊື່ການຄ້າ: PUAY DEANG NOI (LA), BUNGOR (MY)
6. ພັນລະນາລັກສະນະພືດສາດ (botanical description: morphology ແລະ anatomy)

• ລັກສະນະໂຄງສ້າງພາຍນອກ

ໄມ້ເປືອຍແດງນ້ອຍ ເປັນໄມ້ຢືນຕົ້ນຜັດໃບ, ສູງເຖິງ 25 ມ, ລໍາຕົ້ນຊື່,. ເປືອກ ລຽບ ຫຼື ລອກເປັນແຜ່ນບາງໆ, ສີນໍ້າຕານປົນສີແດງແລະສີຂີ້ເຖົ່າ. ໃບ ດ່ຽວ, ຮຽງສະຫຼັບ, ເປັນຮູບຮີ ຫຼື ຮູບໃບຫອກ, ປາຍໃບແຫຼມ ແລະ ກົກໃບປູ້ ຫຼື ມົນ. ໃບອ່ອນສີບົວປົນສີນໍ້າຕານ, ມີຂົນ, ໃບແກ່ສີຂຽວເຂັ້ມ, ກ້ຽງ. ຊໍ່ດອກ ອອກເປັນກຸ່ມຢູ່ປາຍກີ່ງ. ດອກ ດອກເປັນສີບົວເຂັ້ມ ຫຼື ມ່ວງ, ກາບດອກ ມີ 10-12 ສັນຍາວ, ມີ 5-6 ແຊກ. ໝາກ ໝາກແຫ້ງແຕກ, ຮູບຂອບຂະໜານ, ສີນໍ້າຕານເຂັ້ມ.

• ລັກສະນະໂຄງສ້າງພາຍໃນເນື້ອໄມ້

ເນື້ອໄມ້ເປືອຍດອກ​ແດງ ມີສີແດງອ່ອນອົມຂາວ ຄ້າຍຄືສີນໍ້າຕານອົມເທົາ, ສ້ຽນຊື່, ເນື້ອໄມ້ລະອຽດປານກາງ ແລະ ແຂງຫຼາຍ. ລັກສະນະທາງກາຍວິພາກທີ່ເຫັນໄດ້ດ້ວຍແວ່ນຂະຫຍາຍ (Handlens) ຂະໜາດ 10-15 ເທົ່າ ພໍຣ໌ (Pore) ເປັນແບບ ພໍຣ໌ດ່ຽວ (Solitary pore) ເປັນສ່ວນໃຫຍ່ ແລະ ຄູ່ແຝດ (Multiple pore) ຈຳນວນເລັກນ້ອຍ,  ແບບຂອງການຮຽງຕົວບໍ່ເດັ່ນຊັດ,  ການກະຈາຍເປັນ ແບບມີວົງປີ (Ring porous), ພໍຣ໌ມີຂະໜາດໃຫຍ່ພຽງແຖວດຽວໃນຕົ້ນລະດູ ພາຍໃນພໍຣ໌ ມີ Tylose ເກືອບທຸກພໍຣ໌ ນອກນັ້ນ ມີຂະໜາດນ້ອຍໆ ພາຍໃນມີ Tylose ບາງພໍຣ໌, ເສັ້ນ (Ray) ເຫັນບໍ່ຄ່ອຍຊັດເຈນ, ພາເຣງຄິມາ (Parenchyma) ແບບເປັນເສັ້ນ (Fine Line confluent).

7. ການນໍາໃຊ້: ໄມ້ໃຊ້ກໍ່ສ້າງທົ່ວໄປ, ຕົບແຕ່ງພາຍໃນ, ປູກເປັນໄມ້ໃຫ້ຮົ່ມ, ໄມ້ປະດັບ, ໄມ້ອັດ, ແກະສະລັກ, ແປ້ນປູພື້ນ, ເຮັດເຮືອ.
8. ແຫຼ່ງທີ່ຢູ່ອາໃສ: ພົບເຫັນໃນປ່າເຂດຕໍ່າ, ເນື້ອທີ່ເປີດແປນ, ປາຂັ້ນໜຶ່ງ, ປ່າຂັ້ນສອງ, ປາລຽບແຄມນໍ້າ. ມີຄວາມສູງຈາກລະດັບໜ້ານໍ້າທະເລແຕ່ 112 ມ ຂື້ນໄປ.
9. ການກະຈາຍພັນ: ພົບເຫັນຢູ່ປະເທດຈີນ, ໄທ, ອິນໂດເນເຊຍ, ມາເລເຊຍ. ສໍາລັບ ສປປ ລາວ ພົບເຫັນຢູ່ ເມືອງປະທຸມພອນ, ແຂວງຈຳປາສັກ
10. ສະພາບການອະນຸລັກ: ເປັນຊະນິດໄມ້ໃນບັນຊີ II ຂອງຂໍ້ຕົກລົງວ່າດ້ວຍການກຳນົດບັນຊີໄມ້ ສະບັບເລກທີ 0448/ກປ. ເປັນຊະນິດທີ່ມີທົ່ວໄປບໍ່ໄດ້ຮັບການປະເມີນ (NE) ຂອງ Red list of IUCN
11. ໝາຍເຫດ: ໄມ້ຊະນິດນີ້ຈຳແນກໄດ້ງ່າຍໂດຍສັງເກດເບີ່ງເປືອກ ສີນໍ້າຕານປົນສີແດງແລະສີຂີ້ເຖົ່າ, ດອກສີບົວເຂັ້ມຫລືສີມ່ວງ.
12. ເອກະສານອ້າງອີງ

ກະຊວງກະສິກຳ ແລະ ປ່າໄມ້, 2021. ຂໍ້ຕົກລົງ ວ່າດ້ວຍການກຳນົດບັນຊີໄມ້ 1, 2 ແລະ 3 ສະບັບເລກທີ 0448/ກປ, ລົງວັນທີ 6 ເມສາ 2021

https://www.iucnredlist.org/search?query=Lagerstroemia%20floribunda

https://www.google.com/search?q=Lagerstroemia+floribunda

https://padme.rbge.org.uk/laos/list/Lythraceae

https://asianplant.net/Lythraceae/Lagerstroemia_floribunda.htm